ក្រុមបឹងកេត FC បានគ្រងម្ចាស់ដំណែងជើងឯក មិត្តហ្វូនខេមបូឌានលីគ រដូវកាល ២០១៧ បន្ទាប់ពីបានយកឈ្នះលើក្រុមក្រសួងការពារជាតិ ដោយលទ្ធផលប៉េណាល់ទីកាត់សេចក្តី ១០ទល់៩ នៅក្នុងការប្រកួតវគ្គ ផ្តាច់ព្រ័ត្រ នៅកីឡដ្ឋានជាតិ។ នៅក្នុងការ​ប្រកួត​វគ្គ​ទី​១​ បឹងកេត​បាន​ទម្លាយ​សំណាញ់​ទី​របស់​ក្រសួង​ការពារ​ជាតិ​បាន​១​​គ្រាប់ ​នៅ​នាទី​១៤ដោយ​​កីឡាករ​ខ្សែ​ការពារ សុខ សុវណ្ណ ​ខណៈក្រសួង​ការពារ​ជាតិ​បាន​ព្យាយាម​វាយបកវិញ​ និង​​មាន​ឱកាសល្អៗ​ជា​ច្រើន​លើក​ ប៉ុន្តែ​គ្មាន​សំណាង​ សម្រាប់​៤៥​នាទី​បំបូង​នេះ។ ចូលដល់វគ្គ​ទី​២ ក្រសួង​ការពារ​ជាតិ​បាន​តាម​ស្មើ​ ១-១ នៅ​​នាទី​ទី៦៥ ដែលធ្វើសម្រេចដោយ​កីឡាករ​កូរ៉េ​ខាង​ជើង Kim Myong-Hun បន្ទាប់​ពី​វាយ​សម្រុក​ឥត​ឈប់​ឈរ​។ ក្រោយ​​​ពេល​គ្រាប់​បាល់​ស្មើ​គ្នា​ ១-១ ក្រុម​ទាំង​ពីរ​​បាន​ចាប់​ផ្តើម​វាយ​សម្រុក​គ្នា​ទៅ​វិញ​ទៅ​មក ដោយ​​មាន​ឱកាស​ល្អ​ដូច​គ្នា​ ប៉ុន្តែ​​មិន​អាច​រក​គ្រាប់​បាល់​បន្ថែម​បាន​ទេ ដោយបានបញ្ចប់ក្នុងលទ្ធផល ៩០នាទី ១ទល់១ ហើយនៅក្នុងម៉ោងបន្ថែម ១៥នាទី ២ដង ក្រុមទាំងពីរនៅតែរក្សាលទ្ធផលស្មើគ្នា ១ទល់១ ដដែល ដោយតម្រូវឲ្យក្រុមទាំងនេះបន្តទាត់បាល់១១ម៉ែត្រ កាត់សេចក្តីតែម្តង។ ជាលទ្ធផលនៅវគ្គនេះ ក្រុមបឹងកេតបានយកឈ្នះលើក្រុមក្រសួងការពារជាតិ ដោយស្វិតស្វាញជាទីបំផុត ដែលធ្វើសម្រេចបាន១០គ្រាប់ទល់៩គ្រាប់ ដោយបឹងកេត ទាត់មិនចូលចំនួន ៣គ្រាប់ ខណៈការពារជាតិទាត់មិនចូលចំនួន៤គ្រាប់។